Мод, бут сөөгөнд тайралт, хэлбэржүүлэлт хийх ажил үргэлжилж байна
![](https://mail.erdenet.mn/images/news/2b6fc53057a96b8c1f14e9547cca32bd.jpg)
Хотын нийтийн эзэмшлийн гудамж талбайн мод, бут сөөг, ургамалан хашлага болон зам дагуу ургасан улиас модонд мөчрийн тайралт, таналт, ишний шуулт, хэлбэржүүлэлт хийх ажил 90 хувьтай үргэлжилж байна.
Нийт 474ш улиас, агч, монос, хайлааст тайралт хийж, 31.2 мянган уртааш метр шар хуайс тэгшиллээ гэж Цэцэрлэгжүүлэлт ногоон байгууламжийн газраас мэдээллээ.
Ногоон байгууламжаас гарсан улиас модны хог хаягдлыг өдрийн 4 рейсээр 2 машин 96- рейс хогийг зөөж буулгасан байна. Түүнчлэн иргэд аж ахуй нэгжээс ирсэн хүсэлтийн дагуу орон сууцны гаднах модыг таналт хийж хэлбэржүүлэн доороос нь ишний шуулт хийжээ. Үүнд, аймгийн Цагдаагийн газар-68ш, Хүүхэлдэйн театр-7ш, Зэст баг 1 хорооллын 12,13,14,15, 17- байрнуудад-13ш нийт 88 ш модонд шуулт хийсэн байна.
Таналт болон тайралтын ач холбогдол нь гэмтсэн, хатсан өвчилсөн хэсгийг авсанаар ургалтыг эрчимжүүлдэг. Хатсан мөчир салаа нь үндэсний системд ачаалалд өгч цаашдын ургалтад саад болохоос гадна модны чийгийг алдагдуулах шалтгаан болдогтой холбоотой.
Харин бутлаг модонд хэлбэржүүлэлт хийх нь ногоон байгууламжийн арчилгаанд чухалд тооцогддог. Хэлбэрийг нь жигдрүүлэх зорилгоор удаан ургалттай модны сүүлийн жилийн өсөлтийн 25-аас 30 хувийг, түргэн ургалттай модны өсөлтийн 60-аас 75 хувийг тайрдаг байна.
Мэдээллийн төв