Гэр хорооллын хогийг сар бүр ачиж байна
Гэр хорооллын айл өрхийн хог хаягдал ачилт тээвэрлэлтийн дөрөвдүгээр ээлж энэ сарын 1-нээс Баянцагаан, Наран багт эхэлсэн. Хөдөлгөөнт чингэлэгийг Баянцагаан, Наран багууд байрлуулж дууссан бол Шанд, Рашаант, Уртын гол, Цагаанчулуут, Чингэл, Эрдэнэ, Булаг багийн айл өрхийн хог хаягдал ачилт тээвэрлэлт үргэлжилж байна.
Уламжлалт буюу ковшоор Даваат, Баян-Овоот, Яргуйт, Дэнж, Говил багийн айл өрхийн 3 дугаар ээлжийн хог хаягдал ачилт тээвэрлэлт дууссан гэж Хот тохижуулах газраас мэдээллээ.
Орон нутгийн төсвийн хөрөнгө оруулалтаар аймгийн Хот тохижуулах газарт үе шаттай парк шинэчлэл хийснээр ийн гэр хорооллын айл өрхийн хог хаягдлыг сар бүр ачих боломжтой болсон.
2022 онд орон нутгийн төсвийн хөрөнгө оруулалтаар хог хуримтлуулах, ачиж тээвэрлэх зориулалттай 44 чингэлэг, 4 тээврийн хэрэгсэл, 2023 онд орон нутгийн төсвийн 2,6 тэрбум төгрөгийн хөрөнгө оруулалтаар 65 ширхэг хөдөлгөөнт чингэлэг, хог ачиж тээвэрлэх 7 авто машиныг тус тус хүлээлгэн өгсөн билээ.
Өмнөх жилүүдэд улиралд нэг удаа буюу гурван сард нэг удаа хог ачилт хийдэг байсан бол үе шаттай парк шинэчлэлт хийснээр хугацааг багасгаж 45 хоногт нэг удаа болгосон. Харин энэ оны нэгдүгээр сараас эхлэн сар бүр хог ачих боломж бүрдсэн.
Орон сууцны хорооллын 10426 өрхөөс өдөрт дунджаар 15 автомашин буюу 204м.куб хог хаягдал гардаг. Энэ хог хаягдлыг 116 цэгээс 5 автомашинаар 7 хоногийн 5 өдөр ачиж тээвэрлэж байна. Харин гэр хорооллын багийн 13752 өрхөөс өдөрт дунджаар 18 автомашин буюу 612 м.куб хог хаягдлыг 8 автомашин, механизм, 8 жолооч, 4 ачигч, 7 хог хаягдлын хяналт, татвар хураамжийн ажилтан, нийт 19 ажилтны бүрэлдэхүүнтэйгээр татан авалт хийж байна.
Мэдээллийн төв
