Цас ихтэй газар хаваржиж буй малчидаа эргэлээ
Аймгийн Засаг даргын орлогч М.Түмэнжаргал бусад холбогдох албаны хүмүүсийн хамтаар цас ихтэй, хаваржилт хүндэрч болзошгүй Жаргалант сумын Дулаан-Уул багийн Хонгорморьт, Бугын бэлчир, Арцатын аманд хаваржиж буй малчдаа эргэж, малчдынхаа санал хүсэлтийг сонслоо.
Дулаан уул багт 287 малчин өрхийн 62 мянган толгой мал хаваржиж байна. Бод мал харьцангуй гайгүй бог мал багаасаа хоргодож эхэлсэн талаар малчид маань хэлж байна.
Малчид маань өнөөдрийн байдлаар бэлтгэсэн хадлангийнхаа 70 орчим хувийг нь хэрэглэж, 30 хувьтай нь үлджээ. Цаашид цаг агаар хүйтэрч байнгын тэжээлд орох малын тоо нэмэгдвэл өвс, тэжээлийн дутагдал орж болзошгүйд сэтгэл зовниж байна.
Аймгийн Онцгой комисс хуралдаж ирэх даваа гаригаас аймгийн болон Жаргалант сумын Аюулгүйн нөөцийн өвсийг малчдадаа олгохоор шийдвэрлэсэн. Мөн цаашид хаваржилтын хүндрэлээс сэргийлж аймгийн Онцгой комиссоос өвс, тэжээл худалдан авахад 146 сая төгрөгийг шийдвэрлэсэн билээ.
Өнгөрсөн арваннэгдүгээр сараас хойш манай аймагт 42 удаагийн цас орсон. Засгийн газрын 2015 оны 286 дугаар тогтоолоор батлагдсан журмын дагуу зудыг үнэлэх шалгуур үзүүлэлтээр манай аймаг “цагаанаар зудархуу” нөхцөл байдалтай байна. Хунгар газраа 20-25 см, тал газраа 10-15 см цастай байна.
Мэдээллийн төв
