Орхон аймаг, “АЧИТ-ИХТ” ХХК 2023 оны хамтын ажиллагааны хүрээнд есөн арга хэмжээг хэрэгжүүлнэ
Орхон аймаг, “АЧИТ-ИХТ” ХХК 2023 оны хамтын ажиллагааны төлөвлөгөөг баталлаа. Арга хэмжээнд Засаг дарга С.Батжаргал, Засаг даргын орлогч А.Түвшинжаргал болон бусад хэлтэс, агентлагийн дарга нар тус компанийн удирдлагууд оролцлоо.
“АЧИТ-ИХТ” ХХК 2017 оноос хойш орон нутгийн засаг захиргааны байгууллагатай хамтран ажиллаж ирсэн ААНБ юм. Энэ хугацаанд гэрээгээр хүлээсэн үүргээ амжилттай биелүүлж, нийгмийн хариуцлагын хүрээнд боловсрол, эрүүл мэнд, байгаль орчны салбарт идэвх санаачилгатай ажиллаж ирснийг Засаг дарга С.Батжаргал онцолсон.
Аймгийн ЗДТГ, “АЧИТ-ИХТ” ХХК 2022 оны хамтын ажиллагааны гэрээнд 7 ажлыг тусгаж, 100 хувийн биелэлттэй дүгнэгдсэн. 2023 онд 9 арга хэмжээг хэрэгжүүлэхээр төлөвлөөд байна.
- Тухайлбал, ерөнхий боловсролын нэг сургуульд химийн иж бүрэн лаборатори байгуулах,
- “Тэрбум мод” үндэсний хөдөлгөөн, Ногоон Эрдэнэт хөтөлбөрийн хүрэнд 50 мянган ширхэг тарьц суулгац нийлүүлэх болсон нь 2023 оны хамтын ажиллагааны онцлог ажил юм.
- Мөн цэцэрлэгийн дотоод орчны агаарын чанарыг сайжруулах, ажлын байр нэмэгдүүлэх, бизнес эрхлэгчдийг дэмжих чиглэлээр хамтран ажиллана.
2022 оны хамтын ажиллагаанаас дурьдвал, Хог хаягдлын менежментийн чиглэлээр хогийн цэгийн 32 га газрын хогийг хумж цэвэрлэхэд машин механизмаар 1440 метр куб хог хаягдлыг дарж булшилж , хог хаягдлын талбайн нөхөн сэргээлтэд шаардлагатай 1200 метр куб хар шороог ачиж тээвэрлэсэн.
Мөн “Тэрбум мод” үндэсний хөдөлгөөний хүрээнд Орхон аймгийн Баян-Өндөр сумын ИТХ-ын шийдвэрээр Баянцагаан багийн нутаг дэвсгэр Шарчулуутын аманд 135 га ойн санг байгуулж, 720 сая төгрөгийн хөрөнгө оруулалтыг хийсэн билээ.
Боловсрол, эрүүл мэндийн салбарт 57,3 сая төгрөгийн хөрөнгө оруулалтыг хийсэн. ЕБС-ийн 14 дүгээр сургуульд химийн кабинетийг иж бүрэн байгуулж, сургалтын хэрэглэгдэхүүнээр хангасан. Химийн кабинетэд 10-12 дугаар ангийн 136 сурагч, 6-11 дүгээр ангийн 639 сурагч хамрагдан сорилт, туршилтын хичээл орж байна.
Энэ сарын 6-13-ны өдрүүдэд Орхон аймаг, Эрдэнэт хотод зохион байгуулагдах Монголын бүх ард түмний спортын өвлийн XVI наадам, Монголын хүүхдийн спортын өвлийн VII наадамд дэмжлэг үзүүлж тамирчдын хувцыг хийж байгаа “АЧИТ-ИХТ” ХХК-ийн хамт олонд Засаг дарга С.Батжаргал хамт олны нэрийн өмнөөс болон иргэдийнхээ өмнөөс талархал илэрхийллээ.
Мэдээллийн төв
