Ойрын хугацаанд эвдрэл үүссэн авто замуудад нөхөн сэргээлт хийхийг үүрэг болгов

Энэ долоо хоногийн аймгийн Засаг даргын шуурхай хуралдаан болж, хуралдааныг Засаг даргын орлогч А.Түвшинжаргал, М.Түмэнжаргал нар удирдан явууллаа. Өнгөрсөн долоо хоногийн шуурхай хуралдаанаар Засаг дарга С.Батжаргал хэд хэдэн үүрэг даалгавар өгсөн. Тухайлбал, “Ногоон Эрдэнэт” хөтөлбөрийн хүрээнд Хилийн цэргийн ангитай хамтран ажиллах холбогдох гэрээний дагуу ногоон байгууламж нэмэгдүүлж байшаа талаарх мэдээд мэдээллийг иргэдэд хүргэхийг үүрэг болгосон. Үүний хүрээнд Хилийн цэргийн ангитай хамтран хилийн зурвасаас шилжүүлэн суулгах 3000 модыг чимээгүй хотод тарих нүхийг ухаж бэлтгэх ажлыг ХХҮГ, Баян-Өндөр сумын ЗДТГ-тай хамтран зохион байгуулсан.
Орхон аймгийн Тогоочдын холбоотой хамтран Цэнгэлдэх хүрээлэнгийн павильонуудыг ашиглаж худалдаа үйлдвэрлэл явуулах чиглэлээр гэрээ хийх үүрэг даалгавар өгсөн. Уг чиглэлийн дагуу ХБХОХ, ХХААГ, Баян-Өндөр сумын ЗДТГ-аас Орхон аймгийн Тогоочдын холбоотой харилцан санал солилцжээ.
Өнөөдрийн шуурхай хуралдаанаар Засаг даргын орлогч М.Түмэнжаргал холбогдох газруудад хэд хэдэн үүрэг даалгаврыг өглөө.
Үүнд, энэ жил аймгийн хэмжээнд авто зам нөхөх засварын ажлыг “ОРХОН АЗЗА” хийж гүйцэтгэхээр болсон. Бороо орохоос урьтаж дулаан өдрүүдийг ашиглан ойрын хугацаанд яаралтай эвдрэл үүссэн авто замуудад нөхөн сэргээлт хийхийг үүрэг болгов. Мөн мод тарьсан газруудад усалгааг сайтар хийх, үерийн усны далан суваг шуудууг цэвэрлэж, нээхийг холбогдох газруудад үүрэг болголоо.

Мэдээллийн төв