МЭНДЧИЛГЭЭ

Монгол улс, Орхон аймгийнхаа гал голомтыг мөнхөд бадраах ариун үйлсээ нэр төртэй биелүүлж яваа эрчим хүчний салбарын нийт хамт олон, энэ салбарын түүхийг бүтээлцсэн үе үеийн ахмад буурлууд та бүхэндээ Эрчим хүчний салбарт ажиллагсдын баярын мэндийг дэвшүүлье.

Энэ жил Орхон аймагт “Эрдэнэт үйлдвэр” ХХК-ийн Дулааны цахилгаан станцыг 4х12 МВт-аар өргөтгөх, “Эрдэнэтийн Дулааны Цахилгаан Станц”-ыг 35 МВт-аар өргөтгөх ажил амжилттай хэрэгжиж байна. “Эрдэнэт үйлдвэр” ХХК-ийн Дулааны цахилгаан станцыг өргөтгөснөөр хүчин чадал нь 53 МВт болж өсөх бол “Эрдэнэтийн Дулааны цахилгаан станц”-ын хүчин чадал нийт 71 МВт болж өснө. Ингэснээр өдрөөс өдөрт өсөн нэмэгдэж буй эрчим хүч, дулааны хэрэглээг тасралтгүй, найдвартай, хүртээмжтэй, тогтвортой хүргэх юм.

Монгол улсын Тогтвортой хөгжлийн үзэл баримтлалын хүрээнд Орхон аймгийн эрчим хүчний салбарт цаашид байгаль орчинд ээлтэй, нийгэм, эдийн засагт үр ашигтай, Ногоон хөгжлийг дэмжсэн дэвшилтэт техник, технологийг нэвтрүүлэх бодлого баримтлана.

Монгол улс, Орхон аймаг маань ямагт гэрэл, гэгээтэй, халуун, дулаан байгаа нь Эрчим хүчний салбарт ажиллагсад та бүхний нөр их хөдөлмөр, хүчин зүтгэл, санаачилгатай салшгүй холбоотой билээ. Иймд Монгол улсын гал голомтыг сахигч Эрчим хүчний салбарын нийт албан хаагч, ажилтан, эрдэмтэн мэргэд, ахмад буурлууд та бүхэндээ ажлын өндөр амжилт, сайн сайхан бүхнийг хүсэн ерөөе.

Монгол улс, Орхон аймгийн гал голомт мөнхөд бадрах болтугай!

Орхон аймгийн Засаг дарга бөгөөд Эрдэнэт хотын захирагч

Дамбын БАТЛУТ

2017-8-18