Төр, хувийн хэвшлийн түншлэлээр нарны цахилгаан станц байгуулна
Эрдэнэ багийн Сархиа уулын энгэрт 25 га газарт 12.5мВт-ын хүчин чадалтай нарны цахилгаан станц, 50 мВт-ын батарей хураагууртай станцыг төр, хувийн хэвшлийн түншлэлээр байгуулахаар төлөвлөж байна. Нарны цахилгаан станцыг ашиглалтад оруулснаар төвийн эрчим хүчний системд доголдол гарсан үед гэр хорооллын 18 мянган хэрэглэгчийг 5 цагийн турш цахилгаан эрчим хүчээр хангах боломж бүрдэх юм.
Энэ сарын 16-нд хуралдах аймгийн ИТХ-ын хуралдаанаар төр, хувийн хэвшлийн түншлэлээр хэрэгжүүлэх ажлын жагсаалтад энэхүү бүтээн байгуулалтын ажлыг танилцуулж, оруулахаар бэлтгэж байна. Үүний дараа горимын тооцоолол, техникийн нөхцөлийг мэргэжлийн байгууллагаар хянуулж, батлуулан нээлттэй сонгон шалгаруулалтын хэлбэрээр зарлана.
Энэхүү бүтээн байгуулалт дээр төрөөс ямар нэгэн хэлбэрээр төсөв гарахгүй, төр хувийн хэвшлийн түншлэлийн хүрээнд шалгарсан ААНБ бүх хөрөнгийн асуудлаа шийдээд барилга угсралтын ажлаа эхлүүлнэ.
Монгол Улсын Засгийн газраас сэргээгдэх эрчим хүчний талаар нэлээдгүй ярьж байгаа энэ цаг үед 21 аймгаас анхлан Орхон аймаг энэхүү асуудлыг хөндөж, эхлүүлэхээр бэлтгэлээ хангаж байна.
Нийслэлд 200мВт хүртэлх хүчин чадалтай батарей хураагуурын станц бий. Орхон аймагт байгуулах энэхүү станцын давуу тал батарей хураагуур нь төвийн эрчим хүчнээс ямар нэгэн байдлаар цэнэг авахгүй, зөвхөн нарны хавтангаараа цэнэглэгдхээрээ онцлогтой.
“Цэвэр агаартай хот” төслийн хүрээнд хийхээр төлөвлөсөн нэг томооохон ажил нь сэргээгдэх эрчим хүчээр орон нутагтаа бие даасан цахилгааны эх үүсвэр байгуулах юм.
Мэдээллийн төв
