Улсын аварга тариаланч, малчны шагнал гардууллаа

“Элдэв Эрдэнэт” хэмээх модон могой жилийн сар шинийн босгон дээр Орхон аймгийн Жаргалант сумаас 21 дэх удаагийн “Улсын аварга тариаланч”, 18 дахь удаагийн "Улсын аварга малчин” төрлөө. Улсын аваргын цом, цол тэмдгийг өнөөдөр УИХ-ын гишүүн, аймаг орон нутгийн удирдлагууд гардуулан өглөө.

“Улсын аварга тариаланч” Г.Нямцэцэгийн шагналыг аймгийн Засаг дарга Б.Зоригтбаяр гардуулан өгөв. Г.Нямцэцэг нь 38 дахь жилдээ газар тариалангийн салбарт ажилласан хөдөлмөрөө төр засаг, түмэн олондоо үнэлүүлж ийн “Улсын аварга тариаланч” гэх хүндтэй цолыг хүртэж байна.

Тэрээр, 1986 онд Улаантолгойн сангийн аж ахуйн нарийн ногооны 4-р бригадад ногоочноор ажил хөдөлмөрийн гараагаа эхлүүлж байсан бол өдгөө аймаг, орон нутгийнхаа иргэдийг эрүүл хүнсний ногоогоор хангасан “Улсын аварга тариаланч” боллоо.

Нямцэцэг аварга 10 хүнийг байнгын болон түр ажлын байраар хангадаг. Мөдхөн эхлэх хаврын тариалалтын бэлтгэлээ бүрэн базаахын зэрэгцээ үйл ажиллагаагаа өргөжүүлэх чиглэлээр олон зүйлийг төлөвлөн “Элдэв Эрдэнэт” хэмээх могой жилээ угтаж буй талаараа тэрээр ярив.

Аймгийн Засаг дарга Б.Зоригтбаяр “Газар тариалангийн салбарт техник технологийн шинэчлэлийг амжилттай нэвтрүүлэн, хүн амыг эрүүл, чанартай хүнсээр хангах үйлсэд бодитой хувь нэмрээ оруулан ажиллаж байгаад танай гэр бүл, хамт олонд талархал илэрхийлж, XVII жарны модон могой жилдээ арвин их ургацтай, амжилт бүтээлээр дүүрэн байхын ерөөл дэвшүүллээ.

18 дахь удаагийн “Улсын аварга малчин”-аар Раднаабазарын Батжаргалын гэр бүл тодорлоо

Жаргалант сумын Дулаан-Уул багийн малчин Раднаабазарын Батжаргалын гэр бүл “Элдэв Эрдэнэт” хэмээх модон могой жилийн сар шнийн босгон дээр Орхон аймгаас төрсөн 18 дахь удаагийн “Улсын аварга малчин” боллоо.

Улсын аваргын шагналыг УИХ-ын гишүүн Д.Батлут, аймгийн ИТХ-ын дарга Д.Мөнхбат тэргүүтэй албаны хүмүүс гардуулан өгөв. Р. Батжаргал нь 1993 оноос хойш дөрвөн төрлөөр мал сүргээ өсгөн үржүүлж буй хөдөлмөрч малчин юм. Сүүлийн жилүүдэд малынхаа үүлдэр угсааг сайжруулахад анхаарч үхэр сүрэгт Сэлэнгэ үүлдрийн бух, хонин сүрэгтээ Баяд үүлдрийн хуц, ямаан сүрэгтээ Өлгийн улаан , Эрчмийн хар үүлдрийн ухныг сайжруулагчаар тавьж малын чанарыг сайжруулж, ашиг шимийн гарцыг нэмэгдүүлэн ажиллаж байгаа малчин юм.