Аймгийн ИТХ-ын ээлжит бус III хуралдаанаар аймгийн Засаг даргын 2024-2028 оны үйл ажиллагааны хөтөлбөрийг хэлэлцэж, хуралдаанд оролцсон төлөөлөгчдийн 79 хувийн саналаар баталлаа. 

Хөтөлбөрийг боловсруулахдаа Монгол Улсын урт хугацааны бодлогын баримт бичгүүдэд  үндэслэн  2024 онд орон нутгийн сонгуульд оролцохдоо аймгийн МАН-аас дэвшүүлсэн “НИЙГМИЙН АРДЧИЛАЛ-ХҮНИЙ ХӨГЖИЛ” уриатай мөрийн хөтөлбөр, Ардчилсан намаас дэвшүүлсэн “ЭРЧИМТ ХӨГЖЛИЙН ТӨЛӨӨ” уриатай мөрийн хөтөлбөрт тулгуурлан аймгийн Засаг даргын үйл ажиллагааны хөтөлбөрийг  “Эрдэнэт хүний хөгжил” уриатай  4 бүлэг 19 дэд бүлгийн хүрээнд боловсруулсан. 

Мөн үйл ажиллагааны хөтөлбөрийг боловсруулахдаа иргэний нийгмийн байгууллагууд болон иргэдээс санал авах ажлыг зохион байгууж,  давхардсан  тоогоор 

600 хүний 1357 саналыг нэгтгэж тусгасан  байна.   

Хөтөлбөр хэрэгжсэнээр Орхон аймгийн иргэн бүр аймаг орон нутагт хэрэгжиж буй төсөл хөтөлбөрүүд, бүтээн байгуулалтын ажлын үр шимийг бодитойгоор хүртэж чаддаг, оролцоо, дуу хоолой нь орон нутгийн хөгжил дэвшилд хувь нэмэр болдог, төрийн үйлчилгээг шуурхай, хүртээмжтэйгээр авдаг болно гэж үзэж байна.

Мөн аймгийн төдийгүй улс орны нийгэм эдийн засагт чухал үр нөлөө үзүүлэх дараахь томоохон төсөл, хөтөлбөрүүдийг хэрэгжүүлнэ. 
1.    “Эрдэнэт үйлдвэр” ТӨҮГ-ыг түшиглэсэн үйлдвэрлэл, технологийн паркийн хүрээнд зэсийн баяжмал хайлуулах, боловсруулах үйлдвэр байгуулах
2.     Оюутын орд болон бусад хэсгүүдэд эрэл, хайгуулын ажлыг эрчимжүүлж, нөөцийг тогтоож, ашиглалтад бэлтгэх ажлыг эхлүүлж, эрэл, хайгуулын ажилд дэвшилтэт техник, технологи, хиймэл оюун ухааныг нэвтрүүлэх
3.    Эрдэнэт хотын цахилгаан хангамжийг сайжруулахад шаардлагатай 35кВ-ын цахилгаан дамжуулах агаарын шугам, дэд станцуудыг барьж ашиглалтад оруулах
4.     “Төлөвлөлттэй хот”, “Цэвэр агаартай хот”, “Ногоон хот” төслүүдийг хэрэгжүүлэх
5.    “Эрдэнэт үйлдвэр ТӨҮГ-ын хаягдлын шинэ сан байгуулах
6.    “Үйлдвэрлэл, технологийн паркийг түшиглэн машин үйлдвэрийн бүтээгдэхүүн, барилгын материал үйлдвэрлэл, тоног төхөөрөмж ба бусад төрлийн метал, резинэн хийцийн эд ангийн үйлдвэрлэлийг дэмжсэн төслүүдийг хэрэгжүүлэх
7.     “Сургалт-Эрдэм шинжилгээ- Үйлдвэрлэлийн цогцолбор" хотхоныг байгуулан шинжлэх ухаанд суурилсан оюуны үйлдвэрлэлийг хөгжүүлэх
8.     “Эрдэнэт спорт цогцолбор”-ыг шинээр байгуулах
9.    Бүсийн оношилгоо, эмчилгээний төвийг түшиглэн төрөлжсөн мэргэжлийн тусламж үйлчилгээг өргөжүүлж “Хавдрын оношилгоо, эмчилгээ, хяналт- сэргийлэлтийн төв”-ийг байгуулахаар төлөвлөсөн. 

Ажилгүйдлийн төвшинг  бууруулж 7.4 хувьд хүргэнэ

2024 оны байдлаар аймгийн хэмжээнд ажилгүйдлийн төвшин 7.9 хувьтай байна. Үүнийг 7.4 хувь болгон бууруулах зорилт тавьсан. “Хөдөлмөр зуучлалын төв”-ийг шинээр байгуулж, 400-аас доошгүй ажлын байр шинээр бий болгон, нийт 2500-аас доошгүй хүнийг ажлын байранд зуучлах зорилтыг дэвшүүлсэн. 

Чанартай боловсролыг дэмжсэн олон талт үйл ажиллагааг хэрэгжүүлнэ 

Тэгш хүртээмжтэй, чанартай боловсролыг олгохоор “Хамгийн сайн сургууль, цэцэрлэг-Гэрт ойр сургууль, цэцэрлэг”, “Нэг ээлж, цөөн хүүхэдтэй анги” үйл ажиллагааг хэрэгжүүлэхээр төлөвлөөд байна. Мөн “Сургалт-Эрдэм шинжилгээ- Үйлдвэрлэлийн цогцолбор" хотхоныг байгуулан шинжлэх ухаанд суурилсан оюуны үйлдвэрлэлийг хөгжүүлнэ.

Хавдрын оношилгоо, эмчилгээ, хяналт- сэргийлэлтийн төв байгуулна 

Бүсийн оношилгоо, эмчилгээний төвийг түшиглэн төрөлжсөн мэргэжлийн тусламж үйлчилгээг өргөжүүлж “Хавдрын оношилгоо, эмчилгээ, хяналт- сэргийлэлтийн төв”, Нийгмийн эрүүл мэндийн төв болон өрхийн эрүүл мэндийн төвийн барилгыг ашиглалтад оруулан нийгмийн эрүүл мэнд, анхан шатны тусламж үйлчилгээний хүртээмжийг нэмэгдүүлэх, Эрүүл мэндийн ажилтны нийгмийн баталгааг сайжруулж, дотоод болон гадаадад хүний нөөцийг бэлтгэн сургах, туршлага солилцох арга хэмжээг хэрэгжүүлэхээр тус тус тусгасан. 

Мэдээллийн төв