Амьсгалын замын халдварт өвчинтэй тэмцэх, сэргийлэх ажлыг эрчимжүүлэх тухай аймгийн Засаг даргын 01 тоот албан даалгавар албажин гарч, төрийн  байгууллага болон ААНБ-ын удирдлагуудад хүргүүллээ. 

Томуугийн цар тахлын хүндрэлийн үнэлгээгээр 50 дугаар  долоо хоногт аймгийн хэмжээнд томуу, томуу төст өвчин “Алаг цоог дэгдэлт”-ийн  түвшинд байна. Цаашид аймгийн хэмжээний дэгдэлтэд хүрэх төлөвтэй байгаа тул амьсгалын замын халдварт өвчнөөс урьдчилан сэргийлэх, бэлэн байдлыг хангаж, идэвхжил дэгдэлтийн үеийн томуу, томуу төст өвчинтэй тэмцэх хариу арга хэмжээг эрчимжүүлэх зорилгоор  холбогдох байгууллагын удирдлагуудад дараах арга хэмжээг авч хэрэгжүүлхийг даалгалаа. 

Амралтын өдрүүдээр нийт 607 хүүхэд үзүүлж, 26 хүүхэд хэвтэж, 581 хүүхэд зөвлөгөө аваад буцсан байна.   Түргэн тусламжийн дуудлага 410 хүлээн авснаас 152  буюу 37 хувь нь томуу, томуу төст өвчний шалтгаант дуудлага эзэлж, өмнөх  долоо хоногоос 19.9 хувиар  өссөн үзүүлэлтэй байна.  

Нэг. Баян-Өндөр сумын Засаг дарга Б.Мөнхбаяр,  Жаргалант сумын  Засаг дарга Л.Учрал нарт

• 1.1.Харьяа нутаг дэвсгэр дэх  зах худалдааны төвүүд, үзвэр үйлчилгээ, олон нийтийн  газарт  амны хаалт тогтмол  зүүх, халдвар хамгааллын дэглэмийг баримтлан  цэвэрлэгээ үйлчилгээг  тогтмол хийж, амьсгалын замын халдварт өвчнөөс сэргийлэх ажлыг эрчимжүүлэн, хяналт тавьж ажиллах  

 Хоёр. Эрүүл мэндийн газрын дарга Ц.Мөнхцэцэгт :

• 2.1.Томуугийн үеийн тусламж үйлчилгээний чанар хүртээмжийг нэмэгдүүлэх, эрх зүйн баримт бичгийн хэрэгжилтийг хангах  ажлыг зохион байгуулж, хяналт тавих, Тохиолдол удирдлагын тогтолцоонд шилжин хариу арга хэмжээг шуурхай авах, эрсдэлийн үеийн харилцаа холбоог идэвхжүүлэн удирдлага, холбогдох шатны байгууллагуудыг эргэн мэдээллээр хангаж, хамтран ажиллах, тулгамдсан асуудлыг тодорхойлж санал танилцуулан шийдвэрлүүлэх  
•  2.2.Томуугийн тархалтыг бууруулах, хариу хэмжээ авах төлөвлөгөөнд тухай бүр тодотгол хийн, томуугийн идэвхжилийн түвшинг 7 хоног бүрд тодорхойлж, аймгийн Онцгой комиссын болон томуугийн салбар дундын  хурлаас гарсан   шийдвэрийн хэрэгжилтийг хангах ажлыг зохион байгуулж, үр дүнг тооцох, шаардлагатай эм,эмнэлгийн хэрэгсэл, хүний  нөөцийн хангалтыг үнэлэх, бүх шатлалын эрүүл мэндийн байгууллагуудын бэлэн байдлыг хангуулж, мэргэжил арга зүйн зөвлөмжөөр хангаж ажиллах 
• 2.3.Томуугийн харуулдан тандалтын нэгжүүдийг  идэвхжүүлэн, томуугийн сорьц авах, тээвэрлэх, баталгаажуулж, үнэлэх, эргэн мэдээлэх, тохирсон хариу арга хэмжээг зохион байгуулах  
• 2.4.Томуу томуу төст өвчний  дэгдэлтийн үеийг хүндрэл багатай даван туулах, эмнэлгийн тусламж үйлчилгээний чанар хүртээмжийг  нэмэгдүүлэх  хүрээнд анхан шатны эрүүл мэндийн байгууллагуудыг   уртасгасан цагийн зохицуулалтад оруулах, гэрийн эргэлтэд шилжүүлэх,хүүхдийн тасагт  нэмэлтээр эмч, эмнэлгийн мэргэжилтнийг  дайчлан ажиллуулах 
• 2.5.Эрсдэлт бүлгийн  хүн амын судалгааг гарган, томуугаас сэргийлэх дархлаажуулалтад хамруулан  эмнэлгийн тусламж үйлчилгээг шуурхай хүргэж, томуугийн хүндрэл, эндэгдлээс сэргийлэх, үр дүнг тооцох 
• 2.6. Аймгийн Эм ханган нийлүүлэх байгууллага, эмийн сангуудаар худалдаалагдаж байгаа томуу томуу төст өвчний үед хэрэглэгддэг эмийн үнэ, нөөц хангалтад холбогдох байгууллагуудтай хамтран судалгаа, хяналт үнэлгээг  зохион байгуулах
• 2.7.Иргэд,олон нийтэд томуу томуу төст өвчний халдвараас  урьдчилан сэргийлэх, зөвлөгөө, томуугийн нөхцөл байдлын  мэдээлэл, сургалт сурталчилгааг цахим болон  орон нутгийн хэвлэл мэдээллийн албатай  хамтран зохион байгуулах   

Гурав. Бүсийн оношилгоо  эмчилгээний төвийн дарга Ц.Наран-Эрдэнэд:

• 3.1.Томуугийн үеийн тусламж үйлчилгээг чанар хүртээмжтэй үзүүлэхэд шаардлагатай зохицуулалтыг хийж, үйлчлүүлэгчийн аюулгүй байдлыг хангах, үр дүнг тооцох   
• 3.2. Бүсийн оношилгоо эмчилгээний төвийн хүлээн авахаар  үзүүлээд зөвлөгөө аваад буцсан, анхаарах хүүхдийн мэдээллийг бүрэн авч, харьяа сум, өрхийн эрүүл мэндийн төвүүдтэй мэдээлэл солилцож, тусламж үйлчилгээний тасралтгүй байдлыг хангах 
• 3.3.Томуугийн  тусламж үйлчилгээнд шаардлагатай тохиолдолд  эмч,эмнэлгийн мэргэжилтнийг уртасгасан цагаар дайчлан ажиллуулах, багаж тоног төхөөрөмж, шатахуун,  нэмэлтээр 150 ор дэлгэх бэлэн байдлыг хангах, ор, зөөлөн эдлэл, эм,эмнэлгийн хэрэгсэл, хүний нөөцийн төлөвлөлт, холбогдох  зохицуулалтыг  хийж, томуугийн үеийн тусламж үйлчилгээг чанар хүртээмжтэй  зохион байгуулах 

 Дөрөв.Боловсролын газрын дарга О.Ариунгэрэлтэд:

• 4.1.Ерөнхий боловсролын    сургууль, цэцэрлэгийн  хэвийн  үйл ажиллагаа, халдвар хамгааллын  урьдчилан сэргийлэх үйл ажиллагааг   хангахад чиглэсэн  удирдлага, зохион байгуулалтын хариу арга  хэмжээг авч ажиллан  эрүүл мэндийн болон боловсролын  эрх бүхий байгууллагаас   гаргасан  журам, зааврыг мөрдөж, халдварт өвчнөөс урьдчилан сэргийлэх, халдварын үеийн авах арга хэмжээг зохион байгуулж, чанд мөрдөх,  
• 4.2. Амьсгалын замын халдварт  өвчний халдварын тархалтын түвшинг бууруулах   хариу арга хэмжээний хүрээнд  Ерөнхий боловсролын сургууль, сургуулийн  өмнөх байгууллагуудад  шинэ жилийн нэгдсэн арга хэмжээ болон  олон нийтийг хамарсан, хичээлээс гадуурх  үйл ажиллагааг зохион байгуулахгүй байх ,
• 4.3.Томуу,томуу төст  өвчнөөс  сэргийлэх бэлэн байдал, хариу арга хэмжээний  төлөвлөгөөг боловсруулан  харилцаа холбоо,  эм, эмнэлгийн  хэрэгсэл,  багаж тоног төхөөрөмж, хувийн хамгаалах  хэрэгсэл, анги танхим, бие засах, гар угаах газруудын хангалт,байнгын  ажиллагаатай байлгахад  анхаарч, шаардлагатай ариутгал халдваргүйтгэлийн бодисыг  худалдан авах, нөөцлөхөд шаардагдах  хөрөнгө санхүүжилтийг шийдвэрлэх,  
• 4.4.Ерөнхий  боловсролын сургууль, цэцэрлэгийн  орчинд   халдвараас сэргийлэх, бэлэн байдлыг  хангах, хариу арга хэмжээг авч ажиллах чиглэлээр  багш, нийгмийн ажилтан, эмч,эмнэлгийн  мэргэжилтний   ажил үүргийн хуваарийг гарган  үүрэгжүүлэх ,
• 4.5.Эрүүл мэндийн  болон яаралтай  тусламж үзүүлэхэд  шаардлагатай  эм, эмнэлгийн хэрэгсэл, зайнаас халуун  хэмжигчээр ханган  стандартын  дагуу эрүүл  мэндийн үзлэг хийх өрөөг  тохижуулан, эмч,эмнэлгийн мэргэжилтнийг орон тоогоор дагнан  ажиллуулж, амьсгалын замын халдварт өвчний сэжигтэй  тохиолдол  илэрсэн үед  асран хамгаалагчид мэдэгдэн өрхийн эрүүл мэндийн төвд илгээх 
• 4.6.Хүүхдийн  ирцийн тандалтыг  өдөр бүр  бүртгэж, амьсгалын  замын  халдварт өвчлөлөөс  үүдэлтэй   ирцийн өөрчлөлтийг  ердийн үеийн ирцтэй харьцуулалт үнэлгээ хийж,удирдлага болон  Эрүүл мэндийн газар, Боловсролын газарт  7 хоног бүрд  мэдээлэх 
• 4.7.Томуу  томуу төст  өвчний  үеийн сэжиг  бүхий  ханиалгах, халуурах зэрэг  шинж тэмдэгтэй  өвчтэй хүүхэд, суралцагчдыг гэрт нь тусгаарлан, цэцэрлэг сургуульд явуулахгүй байх, эрүүл мэндийн байгууллагад хандахыг  эцэг, эх асран хамгаалагчдад  ойлгуулах 
• 4.8.Хүүхэд, багш, ажилчдад амны хаалтыг тогтмол  зүүлгэх, ханиаж найтаахдаа ам,хамраа гарын шууны дотор талаар таглах, гараа угаах зэрэг эрүүл ахуйн  зөв зан үйл дээр онцлон анхаарал  хандуулж  хэрэгжүүлэхийг уриалах,  үлгэрлэх, хэвшүүлэх,хяналт тавих   
• 4.9.Ерөнхий боловсролын сургууль,цэцэрлэгийн анги танхимд ариутгал, халдваргүйтгэлийг холбогдох тушаал,  зааврын  дагуу үе шаттай  бүрэн  зохион байгуулах

 Тав.Соёл урлаг, аялал жуулчлал, залуучуудын газрын  дарга А.Уранчимэгт:

• 5.1. Соёлын төв, кинотеатр, музей зэрэг үзвэр үйлчилгээний байгууллагаар үйлчлүүлэгчдэд  амны хаалт тогтмол зүүх, халдвар хамгааллын дэглэм сахих зааврыг өгч, амьсгалын замын халдварт өвчнөөс сэргийлэх ажлыг эрчимжүүлэн ажиллах, 

Зургаа.Хэвлэл мэдээллийн албаны дарга В.Цэндхүү -д:

• 6.1. Иргэд,олон нийтэд томуу томуу төст өвчний халдвараас  урьдчилан сэргийлэх, зөвлөгөө, томуугийн нөхцөл байдлын  мэдээлэл, сургалт сурталчилгааг цахим болон  хэвлэл мэдээллийн  байгууллагуудаар  хамтран түгээх   

Долоо. Төрийн байгууллагууд, ААНБ-уудын  дарга, захирал нарт:

• 7.1.Хүүхдийн  эсэн мэнд амьдрах, хөгжих, хамгаалуулах эрхийг хангах, өвчлөл эндэгдлийг бууруулах хүрээнд 2024 оны 12 сарын 16-наас 2025 оны 02 сарын 28-ныг  хүртэл хугацаанд томуу, томуу төст өвчтэй  0-5 хүртэл   насны  хүүхдийг  гэрээр болон эмнэлэгт асрах тохиолдолд 5 хүртэл өдрийн цалинтай чөлөө олгох, цахимаар ажиллуулах  дэмжлэгийг  эцэг эх, асран хамгаалагчдад олгох, боловсрол, эрүүл мэндийн байгууллагууд  дотоод  зохион байгуулалтаар зохицуулалт хийх 
• 7.2.Амьсгалын замын халдварт өвчнөөс сэргийлэх, халдвар хамгааллын дэглэмийг баримтлан цэвэрлэгээ, ариутгал, халдваргүйтгэлийг  мэргэжлийн байгууллагын зөвлөмжийн дагуу   зохион байгуулах

  Найм.Энэхүү албан даалгаврын хэрэгжилтэд хяналт тавьж ажиллахыг  Нийгмийн бодлогын  хэлтэс /Г.Эрдэнэбулган /-т хариуцуулж, биелэлтийг   Засаг даргын  Зөвлөлийн хуралд  танилцуулахыг даалгалаа. 

Мэдээллийн төв