Даваа гарагийн Засаг даргын шуурхай зөвлөгөөн хуралдлаа. Шуурхай зөвлөгөөнийг аймгийн Засаг дарга Б.Зоригтбаяр удирдан явуулав.  Шуурхай зөвлөгөөний эхэнд өнгөрсөн долоо хоногт өгсөн үүрэг даалгаврын биелэлтийг хэлэлцлээ.  Арванхоёрдугаар  сарын 9-ний өдрийн Засаг даргын шуурхай  зөвлөгөөнөөс нийт 9 үүрэг даалгавар өгснөөс бүрэн хэрэгжсэн 3, хэрэгжих шатандаа 6 үүрэг даалгавар байна. 

Аймгийн Засаг дарга "Арваннэгдүгээр сарын 4-нөөс хойш нэлээдгүй олон үүрэг даалгаврыг өгч, олон ажлын хэсэг байгуулсан. Нэг ч удаа хуралдаагүй ажлын хэсэг байна. Үүрэг даалгавар өгдөг ч хангалттай биелүүлж байгаа нь тун цөөн байна. Мөн асуудлаас тойрсон байдлаар хандаж байна. Хугацаатай үүрэг даалгаврыг биелүүлдэггүй, хойрго  ханддаг албан тушаалтнуудад цаашид арга хэмжээ авна" гэлээ. Мөн аймгийн ЗДТГ-ын дарга Б.Ганзоригт ажлын хэсгүүдийг эрчимжүүлэхэд анхаархыг чиглэл болголоо. 

Үүрэг даалгавар: Ашиглалтад бүрэн ороогүй барилгууд иргэдээс  захиалга авч буй асуудалд хяналт хийж иргэдийг хохирохоос урьдчилан сэргийлэх чиглэлээр мэдээ мэдээллийг өгөх.

Биелэлт: Иргэд шинээр баригдаж байгаа орон сууцанд захиалга өгөхдөө юуг анхаарч нягтлах талаар, аймгийн хэмжээнд энэ төрлийн гэмт хэрэг гарч буй шалтгаан нөхцөл болон хэрхэн урьдчилан сэргийлэх талаар аймгийн ЗДТГ-ын ХБТХОХ, ГХБХБГ, Цагдаагийн газар, Шүүхийн Тамгын газартай хамтран Хуулийн цаг нэвтрүүлэг бэлтгэж иргэд, олон нийтэд мэдээлсэн. Мөн энэ талаар холбогдох хуулийн асуудлаар зөвлөмж, постер, мэдээлэл цахимаар түгээсэн. /ЗДТГ-ын Хууль эрх зүйн хэлтэс/

Үүрэг даалгавар:Аймгийн хэмжээнд хүүхдийн тоглоомын талбайд  үзлэг шалгалт хийж шаардлагатай төсвийг орон нутгийн болон Баян-Өндөр сумын 2025 оны төсөвт тусгах.

Биелэлт: Хүүхдийн тоглоомын талбайд хийсэн үзлэг шалгалтаар 106 тоглоомын талбайд 96.8 сая төгрөгийн засвар үйлчилгээ хийх шаардлагатай гэсэн судалгаа гарч, төсвийн тооцооллыг Баян-Өндөр сумын ЗДТГ-т хүргүүлсэн. /Хот тохижуулах газар/

Үүрэг даалгавар:Он дамжин хийгдэх хөрөнгө оруулалтын ажлын  талаарх мэдээллийг нэгтгэн танилцуулах.

Биелэлт: Он дамжин хэрэгжих улсын төсвийн хөрөнгө оруулалтаар хийгдэх 2 төсөл арга хэмжээ, орон нутгийн төсвийн хөрөнгө оруулалтаар хийгдэх 64 төсөл арга хэмжээний судалгааг Хот байгуулалт, барилга захиалагчийн албанаас гаргаж, танилцуулсан. /Хөгжлийн бодлого төлөвлөлт, хөрөнгө оруулалтын хэлтэс/ 

Үүрэг даалгавар: Зөвшөөрөлгүй асгаж байгаа барилгын шорооны асуудалд онцгой анхаарах.  Зөвшөөрөл аваагүй цэгт асгасан аж ахуй нэгжүүдэд хариуцлага тооцох.

Биелэлт: 2024 онд 12 аж ахуйн нэгж, байгууллагад 34451 м3 барилгын суурийн шороог зөөвөрлөх цэгийг тогтоон, Эрдэнэ багийн нутаг дэвсгэрт үүссэн карьер луу зөөвөрлүүлсэн. Барилгын суурь шороо зөөвөрлөх явцад идэвхтэн байгаль хамгаалагчид тогтмол хяналт тавин ажиллаж байна. /Баян-Өндөр сумын ЗДТГ/ 

Үүрэг даалгавар: Үерийн суваг, гуу жалга, хур хог цэвэрлэх ажлыг зохион байгуулж шар усны үерээс урьдчилан сэргийлэх.

Биелэлт:Онцгой байдлын газар, Хотын захирагчийн алба, Баян-Өндөр сумын ЗДТГ-аас хамтран шар усны үерийн аюулаас урьдчилан сэргийлэх зорилгоор инженерийн хийцлэлтэй бетонон далан, байгалийн үерийн суваг, шуудуунд үзлэг хийсэн.     Нийтийг хамарсан ажил зохион байгуулах төсөл боловсруулан ХХҮГ-аас санхүүжилт гарган зорилтот бүлэгт хамрагдсан ажилгүй иргэд, ажил идэвхтэй хайгч 25 иргэнийг хамруулан  энэ сарын 03-07-ны өдрүүдэд 10 багийн 31 байршилд нийт 23578.5м2 талбайгаас 450.8м3 хогийг цэвэрлэн ачуулаад байна./Онцгой байдлын газар/ /

Үүрэг даалгавар:  Инженерийн шугам сүлжээ, эрчим хүч, дулааны асуудлыг шийдэх ажлын хэсгүүд яаралтай хуралдаж, 2025 оны орон нутгийн төсөвт тусгах  саналыг танилцуулах.

Биелэлт: 2024 оны арванхоёрдугаар сарын 12-нд аймгийн цахилгаан хангамжийг сайжруулах, хүчдэлийн уналтыг арилгах, гэр хорооллын айл өрхийн 50 хувийг цахилгаан халаалтаар шийдвэрлэх ажлын төлөвлөгөө, Баян-Өндөр сумын орон сууцны оршин суугчдаас халаалт, цэвэр, бохир усны шугамууд шаардлага хангахгүй байгаа тухай гомдол ихээр гарч байгаатай холбогдуулан хотын хэмжээнд инженерийн шугам сүлжээг өргөтгөх, шинэчлэх ажлын тооцоо судалгааг тус тус гарган аймгийн Засаг даргад танилцуулсан. /Хотын захирагчийн алба/ -аас тус тус ирүүлсэн байна. 

Мэдээллийн алба