Жаргалант сум 500 тоннын багтаамжтай төмс, хүнсний ногооны зоорио хүлээн авлаа
Ургац хураалт үргэлжилсэн намрын их ажлын үед Монгол Улсын хэмжээнд иж бүрэн механикжсан төмс, хүнсний ногооны анхны зоорийг Орхон аймгийн Жаргалант сум ашиглалтад орууллаа.
Тодруулбал, ХХААХҮЯ-наас баталсан жишиг зургийн дагуу орон нутгийн төсвийн 3,8 тэрбум төгрөгийн хөрөнгө оруулалтаар стандартын шаардлага хангасан 500 тоннын багтаамжтай зоорио өнөөдөр хүлээн авав.
Арга хэмжээнд аймгийн Засаг даргын Тамгын газрын дарга Ш.Ганболд тэргүүтэй албаны хүмүүс болон Жаргалант сумын удирдлагууд, тариаланчид, иргэдийн төлөөлөл оролцов. Туузыг Жаргалант сумаас төрөн гарсан сум, аймаг, улсын аварга ногоочин, гавьяат тариаланчид хайчиллаа.
Улсын тэргүүний Жаргалант сум 1073 өрх, 3400 гаруй хүн амтай. Газар тариалангийн үйлдвэрлэлийг сумын 265 иргэн, гурван аж ахуйн нэгж эрхэлж, жилд дунджаар 1500 тонн төмс, 5500 тонн хүнсний ногоо хураан авдаг.
.jpg)
Сумын хэмжээнд 6000 тоннын багтаамжтай 166 энгийн болон нүхэн зооринд тариаланчид ургацаа хадгалж ирсэн. Нүхэн зооринд технологи дагаж мөрдөх боломжгүй учир хадгалсан ногооноос тодорхой хэмжээгээр хорогдол гарна. Энэ нь тариаланчдын олон сарын хөдөлмөрийн үр шимийг үнэгүйдүүлэх, ногооны чанар муудах гэхчлэн сөрөг үр дагавартай байв.
Харин иж бүрэн механикжсан зоорьтой болсноор ногоочид төмс, хүнсний ногоогоо хорогдолгүй хадгалах мөн аймгийн ард иргэдээ эрүүл хүнсний ногоогоор хангах боломж бүрдлээ.
Тус зоорь нь 24х36-ийн хэмжээтэй, 864 мкв талбайтай. Төмс, лууван, манжин, байцаа зэргийг тус тусад нь хадгалах 5 хэсэгтэй. Мөн хяналт удирдлагын байр, ажилчдын амралтын болон захиргааны өрөөтэйгөөс гадна жижиглэн худалдаа эрхлэх 1000 мкв талбай, автомашины зогсоолийг цогцоор нь шийдсэн бүтээн байгуулалтыг "Сэнгүн констракшн" ХХК гүйцэтгэсэн.
Дашрамд дурдахад, өнөөдрийн байдлаар ургац хураалт Жаргалант суманд 67 хувьтай үргэлжилж байна. Энэ жил 5594 га талбайд ургац хураалт хийхээс 3800 га талбайд хийгээд байгаа аж. Үүнээс төмс 75 хувьтай, хүнсний ногоо 25,8 хувьтай байна.
Мэдээллийн төв
