Орон нутагт хаваржилт хүндэрч буйтай холбоотойгоор  Монгол Улсын Засгийн газрын 2024 оны хоёрдугаар сарын 14-ний өдрийн хуралдаанаар  байгуулсан 6 ажлын хэсэг орон нутагт ажиллаж буй. Хойд бүсийн Хөвсгөл, Булган, Орхон аймгуудад Боловсрол шинжлэх ухааны сайд Л.Энх-Амгалангаар ахлуулсан  Засгийн газрын “ШУУРХАЙ БҮЛЭГ III” ажиллаж байгаа билээ.  Албаныхан өнөөдөр манай аймагт ажиллаж, аймгийн Онцгой комиссын гишүүдтэй хамтарсан хурал хийлээ. 

    Хурлын эхэнд Засаг даргын орлогч М.Түмэнжаргал аймаг, орон нутгийн хаваржилтын цаг үеийн байдлыг танилцуулав.  2023 оны мал тооллогоор  Орхон аймаг  170 гаруй мянган толгой мал тоолуулсан. Үхэр, адуун сүргийн тоо толгой өсөж, ямаан сүргийн тоо толгой өмнөх жилүүдээс буурсан дүнтэй гарсан. 

Өнгөрсөн арваннэгдүгээр сараас хойш манай аймагт 42 удаагийн цас орсон. Засгийн газрын 2015 оны 286 дугаар тогтоолоор батлагдсан журмын дагуу зудыг үнэлэх шалгуур үзүүлэлтээр манай аймаг “цагаанаар зудархуу” нөхцөл байдалтай байна.  Хил залгаа нутгуудад 369 өрхийн 63,3 мянган толгой мал өвөлжиж байна. Өнөөдрийн байдлаар 500 гаруй толгой мал хорогдсон. Ирэх даваа гаригийг Жаргалант сумын болон аймгийн нөөц өвс, тэжээлийг малчдадаа тараана. Мөн цаашид хаваржилтын хүндрэлээс сэргийлж аймгийн Онцгой комиссоос өвс, тэжээл худалдан авахад 146 сая төгрөгийг шийдвэрлэсэн” гэх мэдээллийг өглөө. 

     Мөн энэ үеэр улсын нөөцөөс Орхон аймагт хуваарилсан 60 тонн  тэжээлийг аймгийн Онцгой комиссоос хаваржилтын нөхцөл байдал хүнд байгаа бусад аймаг, сумдад олгох саналыг гаргасан юм. 

Энэ талаар Боловсрол шинжлэх ухааны сайд, ахлуулсан  Засгийн газрын “ШУУРХАЙ БҮЛЭГ III”-ын ахлагч  Л.Энх-Амгалан “ Орхон аймаг бие даан өвс тэжээлийн нөөц бүрдүүлсэн нь зэргэлдээ аймаг сумдад үлгэр жишээ болохуйц эерэг нөлөөг үзүүлж” байна хэмээн талархалаа илэрхийлэв. 

Засгийн газрын “Шуурхай бүлэг III”  аймгийн Онцгой комиссын хамтарсан хурлаас  дараах шийдвэрийг гаргалаа. 

• Өвөлжилт, хаваржилтын нөхцөл байдал хүндэрч болзошгүй нөхцөл байдлыг харгалзан мал бүхий иргэдэд дэмжлэг үзүүлэх,тусгай төлөвлөгөө гарган ажиллах 
• Жаргалант сумын Эрүүл мэндийн төв, ЗДТГ-т туулах чадвар сайтай авто машин худалдан авах зардлыг аймгийн төвсийн зохицуулалтаар шийдвэрлэх, 
• Мал амьтны гоц халдварт өвчнөөс урьдчилан сэргийлэх вакциныг татан авах ажиллагааг зохион байгуулах, малын шилжит хөдөлгөөн, отор нүүдлээр ирэх малд гоц халдварт өвчний идэвхтэй болон идэвхгүй тандалтыг зохион байгуулах зардлыг шийдвэрлэх, 
• Даарч муудсан малыг хурдан сэргээх, тэжээлийн дутагдлаас бүрэн гаргаж эмчлэх малын эм бэлдмэл, нэмэлт тэжээл, амин дэм, эрдэс амин хүчлийн хэрэглэхдээ мал эмнэлгийн хүрээлэн болон мэргэжлийн бусад байгууллагын зөвлөмж зааврыг ашиглах, 
• Зүй бусаар хорогдсон малын сэг зэмийг устгах, ариутгал халдваргүйтлийн арга хэмжээг аймаг, сумын хэмжээнд төлөвлөж, хүн хүч техник хэрэгслийн тооцоог нарийвчлан гаргаж , мэргэжлийн байгууллагуудтай хамтран ажиллах, 
• Аймаг, сумын шуурхай штабт ажиллаж төрийн албан хаагчдын цалин, илүү цагийн хөлсийг тооцож олгох, хөдөлмөрийн аюулгүй байдлыг хангах тусгайлсан арга хэмжээг авч хэрэгжүүлэх, 
• Шар усны үер, малчдын хаваржааны цасыг гаргах, малын сэг зэмийг устгах, цасанд хаагдсан зам давааг нээх ажлыг Нийтийг хамарсан ажлын хүрээнд зохих журмын дагуу санхүүжүүлж, зохион байгуулах, 
• Малчдад туслах аян, сайн дурын ажил зохион байгуулах 

Шийдвэрийн биелэлтийг 7 хоног бүр Засгийн газрын “Шуурхай бүлэг III”-т танилцуулж байх шийдвэрийг гаргалаа. 

Мэдээллийн төв