Адуу, айрагны өв соёлтой танилцаж “Айраг наадам-2022”-т саатаарай

Энэ сарын 13, 14-ний өдрүүдэд Булган аймгийн Сайхан сум, Орхон сумын залгаа Өрмийн цагаан нуурийн эрэгт "Айраг наадам"-ыг зохион байгуулахаар зохион байгуулагчид бэлтгэл ажлаа хангаж байна. ЮНЕСКО-ийн Хүн төрөлхтний соёлын биет бус өвийн жагсаалтад “Хөхүүрийн айраг исгэх уламжлал, холбогдох зан үйл” нэршлээр Монгол улсаа төлөөлөн албан ёсоор бүртгүүлсэн айраг үйлдвэрлэх зан заншил, эртний уламжлалыг соёлын биет өв хэлбэрээр тээн, түгээн дэлгэрүүлж буй малчид, адуучдыг хамруулан зохион байгуулдаг уламжлалтай наадам юм.
Орхон, Булган аймаг 2020-2024 онд хамтран ажиллах гэрээг байгуулж, 14 чиглэлээр 71 арга хэмжээг хэрэгжүүлэхээр тусгасан. Үүний хүрээнд өв соёл түүх уламжлалаа сэргээх, түгээн дэлгэрүүлэх зорилгоор Орхон аймгийн ЗДТГ “Айраг наадам-2022” арга хэмжээг дэмжиж, хамтран зохион байгуулж байна.
Өнөөдөр Булган аймгийн ЗДТГ-ын дарга Д.Алтаншагай тэргүүтэй албаны хүмүүс Орхон аймгийн Засаг даргын орлогч М.Түмэнжаргал, Хөрөнгө оруулалт хөгжлийн бодлогын хэлтсийн дарга С.Даваадорж болон холбогдох бусад албаны хүмүүстэй уулзаж арга хэмжээний талаар санал солилцлоо.

Өрмийн цагаан нуурын эрэгт болох айраг наадмын үеэр хурдан дааганы уралдаан, чансаа өндөр 64 бөхийн барилдаан, шагай наадгай болохоос гадна залуучуудыг хамруулсан спорт, соёл урлагийн арга хэмжээг өргөнөөр зохион байгуулахаар төлөвлөж байна. Мөн Булган аймгийн 16 сум гэр барьж гадна дотнын зочдод өөрсдийн онцлогоо сурталчлах юм. Гүүний зэлэн дээрээс хөхүүрийн айраг шимэх, худалдаа үйлчилгээ, хоол үйлдвэрлэл, уламжлалт тоглоом наадгайн тэмцээн гээд бүхий л төрлийн үйл ажиллагаа Өрмийн цагаан нуурын эрэгт хоёр өдрийн турш өргөн болно.

Түүнчлэн Орхон аймагт аялал жуулчлалын чиглэлээр үйл ажиллагаа явуулдаг иргэн, аж ахуйн нэгж байгууллага уг арга хэмжээнд оролцож өөрсдийн бүтээгдэхүүн, үйл ажиллагаагаа сурталчлах боломжтой гэдгийг зохион байгуулагчид онцлон хэллээ. Энэ жилийн айраг наадмын хамтран зохион байгуулагчаар Орхон аймгийн ЗДТГ, БОАЖЯ ажиллаж байна.

Мэдээллийн төв