Төрийн албаны II улирлын ерөнхий шалгалтын бүртгэл маргааш эхэлнэ

Энэ оны Төрийн албаны II улирлын ерөнхий шалгалтын бүртгэл маргааш буюу 24-ний 09:00 цагт эхэлж, ирэх сарын 9-ны 09:00 цаг хүртэл үргэлжилнэ.

Энэ талаар Төрийн албаны зөвлөлийн Орхон аймаг дахь салбар зөвлөлийн гишүүн, аймгийн ИТХ-ын Нарийн бичгийн дарга Б.Ганзориг, салбар зөвлөлийн нарийн бичгийн дарга А.Өнөржаргал нар олон нийтэд мэдээлэл өглөө.

Шалгалтыг тавдугаар сарын 22-нд аймгийн ЗДТГ-ын Төрийн албан хаагчийн сургалтын танхимд зохион байгуулна. Шалгалт өгөх хүсэлтэй иргэд Төрийн албаны зөвлөлийн www.csc.gov.mn цахим хаягаар нэвтэрч бүртгүүлнэ үү.

2022 оны долоодугаар сарын 5-нд Төрийн албаны тухай хуульд нэмэлт өөрчлөлт орж Төрийн албаны ерөнхий шалгалтыг улиралд нэгээс доошгүй удаа зохион байгуулах зохицуулалтыг тусгасан.

2024 оны эхний 4 сард Төрийн албаны удирдах болон гүйцэтгэх албан тушаалын тусгай шалгалт зохион байгуулах хүсэлтийг 11 байгууллагын 17 сул албан тушаалын захиалгыг хүлээн авч, туслах түшмэлийн -1, дэс түшмэлийн 3, ахлах түшмэлийн -2 удаа нийт 6 удаа тусгай шалгалтыг 17 сул орон тоонд зохион байгуулахад 11 төрийн жинхэнэ албан хаагч болон төрийн жинхэнэ албаны нөөцөд бүртгэлтэй иргэд тэнцсэн.

Төрийн албаны салбар зөвлөлөөс тэнцсэн 11 оролцогчыг нэр дэвшүүлэн тухайн байгууллагуудад томилж, нийт сул албан тушаалын 64.7 хувь нь нөхөгдсөн.

Мөн энэ оны 1 дүгээр улирлын ерөнхий шалгалт зохион байгуулахад 103 иргэн шалгалтад оролцохоор бүртгүүлсэнээс 81 иргэн буюу 78.6 хувь нь шалгалтад оролцон, 13 иргэн буюу 16.0 хувь нь тэнцсэн.

Цаашид төрийн албанд ажиллах хүсэлтэй иргэдийг төрийн албаны ерөнхий шалгалтын бүртгэлээ баталгаажуулж амжилттай оролцохыг урьж байна.

Мэдээллийн төв