Гуравдугаар сараас хорт хавдрын бай эмчилгээг орон нутагтаа хийдэг болно
Аймгийн Засаг дарга С.Батжаргал иргэдийн санал бодлыг сонсох 2022 оны ажлаа тайлагнаж, 2023 онд улс болон орон нутгийн төсвийн хөрөнгө оруулалтаар хийх ажлын мэдээлэл өгөх уулзалт үргэлжилж байна. Энэ даваа гаригт эхэлсэн иргэдтэй хийх уулзалт ням гаригт өндөрлөх юм. Өчигдөр 18:00 цагт Баянбулаг багийн иргэдтэй уулзсан.
Амьдарч буй багтаа тулгамдаж буй асуудал, шийдвэрлэсэн асуудлын талаар бүтээлч ажил хэрэгч санал, санаачилгыг гаргаж, уулзалтадаа идэвхтэй оролцсон иргэдэд Засаг дарга С.Батжаргал талархал илэрхийлсэн.
Иргэдтэй хийх уулзалтад тухайн багаас сонгогдсон аймгийн ИТХ-ын төлөөлөгчид болон хэлтэс, агентлагийн дарга нар биечлэн оролцож, иргэдэд мэдээлэл өгч байгаа юм. Тус багийн иргэдийн зүгээс гэрэлтүүлэг, камержуулалт, 16 дугаар сургуулийн спорт заал, эрүүл мэндийн тусламж үйлчилгээ, хүүхдийн мөнгө зэрэг асуудлаар санал хүсэлтээ илэрхийлсэн юм.
.jpg)
Тухайлбал, тус багийн иргэн аймаг, орон нутагтаа хими эмчилгээг хийх боломжтой эсэх талаар асуулт асуусан. Үүнд “Хавдрын эмчилгээнд хими, бай гэсэн хоёр төрлийн эмчилгээг хийдэг. Орхон аймаг 10 жилийн өмнөөс хими эмчилгээг хийж эхэлсэн. Хүнд өвчтэй иргэн зайлшгүй Улаанбаатар хот руу эмчилгээнд явж байгаа нь бай эмчилгээ юм. Хавдар судлалын үндэсний төвөөс Орхон аймаг хорт хавдартай иргэдийнхээ 70 орчим хувийг орон нутагтаа эмчилж байна гэх 2022 оны судалгааг гаргасан. 2023 онд бай эмчилгээг орон нутагтаа нэвтрүүлэхээр эм эмнэлгийн хэрэгслийн худалдан авах ажиллагааны тендерт бүрэн тусгасан. Өнөөдрийн байлаар тендер зарлагдсан. Ирэх гуравдугаар сар гэхэд бай эмчилгээ шаардлагатай иргэдээ орон нутагтаа эмчилдэг болно” гэлээ.
Уг мэдээлэлд иргэд талархаж буйгаа илэрхийлэн аймаг орон нутгийн удирдлагуудын цаашдын ажилд амжилт хүсэв.
Мэдээллийн төв
